Col 4 | NdeIBE | STEP | Makhosi, nikani izigqili zenu okulungileyo lokufaneleyo, ngoba liyakwazi ukuthi lani lileNkosi ezulwini.

Colossians 4

1 Makhosi, nikani izigqili zenu okulungileyo lokufaneleyo, ngoba liyakwazi ukuthi lani lileNkosi ezulwini.

Ezinye Iziqondiso

2 Zinikeleni ekukhulekeni, liqaphele njalo libonga. 3 Lisikhulekele lathi futhi, ukuba uNkulunkulu avulele ilizwi lethu umnyango, ukuze sitshumayele imfihlakalo kaKhristu, engayibotshelwayo. 4 Khulekelani ukuba ngiyitshumayele ngokucaca okufanele ngikwenze. 5 Hlakaniphani kulokho elikwenzayo kwabangaphandle; sebenzisani amathuba wonke ngokugcweleyo. 6 Ingxoxo yenu kayihlale igcwele umusa, ifakwe itshwayi, ukuze likwazi ukuphendula umuntu wonke.

Ukuvalelisa

7 UThikhikhu uzalitshela izindaba zonke ngami. Ungumzalwane othandekayo, umfundisi othembekileyo lenceku kanye lami eNkosini.

8 Ngimthuma kini ngenjongo enxwanelweyo ukuba lazi ngomumo wethu lokuze sikhuthaze izinhliziyo zenu. 9 Uza lo-Onesimu, umzalwane wethu othembekileyo lothandekayo, ongomunye wenu. Bazalitshela konke okwenzakala lapha.

10 U-Aristakho engibotshwe laye uyalibingelela, loMakho umzawakhe kaBhanaba. (Selamukela iziqondiso ngaye; angeza kini, limamakule.) 11 UJesu, othiwa nguJustu, laye uyalibingelela. Laba yibo kuphela abangamaJuda kulabo engisebenzela umbuso kaNkulunkulu labo, njalo sebebonakalise ukuthi bayinduduzo kimi. 12 U-Ephafra, ongomunye wenu lenceku kaKhristu uJesu, uyalibingelela. Uhlezi elikhulekela kakhulu, ukuba liqine kuyo yonke intando kaNkulunkulu, liphelele njalo lithembile. 13 Ngiyamfakazela ukuthi uyalisebenzela kakhulu lina kanye lalabo abaseLawodikheya labeHiyerapholisi. 14 Umngane wethu othandekayo uLukha, udokotela, loDemasi bayalibingelela. 15 Ngibingelelelani abazalwane abaseLawodikheya, loNimfa kanye lebandla endlini yakhe.

16 Emva kokuba incwadi le seliyifundelwe, bonani ukuthi iyafundwa lasebandleni laseLawodikheya lokuthi lani libale incwadi evela eLawodikheya.

17 Tshelani u-Akhiphusi lithi: “Bona ukuba uyawuqeda umsebenzi owamukele eNkosini.”

18 Mina, Phawuli, ngiloba ukuvalelisa lokhu ngesami isandla. Khumbulani izibopho zami. Umusa kawube lani.